***
Մուկը մատը մատին կտա,
Տան կարասը պատին կտա:

***
Արտին մոտիկ՝ մոռ ու մորի,
Մռռան կատուն կտրորի:

***

Ունի չունի,ունի չունի,
Լիքը բան կա, որ չունի,
Բայց,որ չունի ինչ անի

***
Սա ասի՝ նա կանի, նա ասի՝ սա կանի:

***

Չոր ցցին՝ սառ տանձաջուր,
Չալ ծտին՝ չար ծտաճուտ։

***
Զարթուցիչը ջեռուցիչից հեռու՛ դիր:

***
Ճուտը ճկեց ծիտը, կծեց ծտի ճիտը:

***
Մուկն ու կատուն
Այս դարում
Հաշտ կխաղան
Օրն ի բուն:
Կվազվզեն իրար հետև,
Կպախկվեն դռան հետև:

***
Բուռ-բուռ ալյուր շաղեցինք,
Փուռը տարանք եփեցինք,
Փռապանը համեմեց,
Բուռ-բուռ ցորեն նվիրեց:

***
Հարսնապու՞ր,
Կաթնապու՞ր,
Անուշապու՞ր,
Թանապու՞ր,
Ո՞րը եփեմ Ասատուր:

***

Ձուկը գցեմ ձուկը ուտեմ,
Մուկը գցեմ ձուկը ուտեմ:

***
Մեր տան դռան տանձի ծառին
Տասը ծանր տանձ կա կախված:

***
Ձմռան ցուրտը երբ տիրեց
Սառնամանիքը պատեց,
Սառույցը կոտրելու
Սառցաբեկը գործ դրեց:

***
Հավը հավկիթ ածեց,
Ջայլամը տեսավ զարմացավ,
Ջայլամը հավկիթ ածեց,
Հավը տեսավ զարմացավ:

***
Ծույլ-ծույլ կնստես
Աստղերին բույլ կտեսնես:

***
Մկրատ տուր մտրակ տամ,
Մտրակ տուր մկրատ տամ

***
Սարի ուսին սիրուն լուսին,
Սիրուն լուսին սարի ուսին:

***
Ձուկ եմ, ձուկ եմ, ջրի մուկ եմ,
Մուկ եմ, մուկ եմ, ջրի ձուկ եմ:

***
Ճայը ճկեց ճիտը, կծեց ճտի ճիտը

***
Ձին ձորում, Ջորին ջրում:

***
Կար–չկար մի գաճաճ արջ կար,
Այդ գաճաճ արջի աջ աչքը չկար։

***
Ծտի ճուտը՝ ճմբան ծերին,
Ծտի ճտի ճիտը՝ ծուռ։

***
Քեռու ջորու ձախ ճուռը ծուռ է

***
Փայտփորիկը փորեց փայտի փտած փորը

***
Գառը գարնան, ձյունը ձմռան:

***

Մեր շունը ութ աշուն տեսավ,
Իսկ աշունը՝ քանի՞ շուն:
Շա՛տ ափսոս, որ շուն չի հաշվում
Աշխարհում ոչ մի աշուն:

***

Մոլոր ակը կլոր ակ է,
Կլոր ա՞կ է մոլորակը:

***

Ցեխից ցատկեմ՝ սեխ ուտեմ,
Սեխից ցատկեմ՝ ՝ սեխ ուտեմ,
Ցեխով՝ ոտքերս բոբիկ,
Սեխով՝ քիթս սեխոտեմ:

***

Թոնիր, թոնիր,
Տոնդ տոնիր:
Տոնդ հացով
Տոնիր, թոնիր:

***

Ծտի ընտրած ծառը ուռ էր:
Ծտի ճտի ճիտը ծուռ էր:

***

Կատուն գնաց կաթնատուն,
Ասաց՝ այ լավ կատվատուն,
Ամոթ էլ է, չգիտեմ
Ո՞վ է շռայլ կաթնատուն:

***

Քանի՞ նուռ կա մի բռան մեջ,
Քանի՞ հատիկ՝ մի նռան մեջ,
Քանի՞ հատիկ՝ ճաքած նռան,
Ճաքած նռան բաց դռան մեջ:

***

Ստի սուտը ստի տուտ է,
Ստի տուտը՝ ստի ճուտը:

***

Ոչ քեզ, ոչ ինձ,
Ոչ քեզ, ոչ ինձ,
Ոչինչ բացի մկան պոչից,
Մկան պոչից բացի ոչինչ՝
Ոչ քեզ, ոչ ինձ,
Ոչ քեզ, ոչ ինձ:

***

Ով օգնում է՝ հոգնում է,
Բայց հոգնում է օգնելիս:
Թե օգնելիս են հոգնում՝
Գոհ են նաև հոգնելիս:

***

Համով, համով, համով, համով,
Համով ծամոն ունի Համոն,
Համով ծամոն ծախող Համոն
Իր ծամոնն է ծամում համով:

***

Լավաշն ասաց լավաշին՝
Հրավիրված եմ խաշի,
Կուզե՞ս դու էլ եկ գնանք,
Կարծումեմ շատ չի քաշի:

Գնացին բայց ետ չեկան
Լավաշները այն խաշից…

***

Կապկի՜ր, կապկի՜ր, ա՜յ կապիկ,
Ինչքան կարող ես՝ կապկի՜ր:
Կապկելում չի հաղթելու
Աշխարհում ոչ ոք կապկիդ:

***

Կարպետի վարպետը
Վարպետաց վարպետն է:
Վարպետի կարպետը
Կարպետաց կարպետն է:

***

Կետը ծովում հսկա՜ կետ է,
Կետը տողում՝ փոքրիկ կետ,
Ոչ մեկին էլ չի հաջողվում
Տեսնել կետին կետի հետ:

***

Կատուն գնաց կաթնատուն,
Ասաց՝ ա՜յ լավ կատվատուն,
Ո՞վ է տեսնես այդ շռայլ,
Շռայլաշատ կաթնատուն:

***

Կատուն կպավ կատվի պատվին,
Կատվի պատվին կպավ կատուն:
Կատուն կատվին կանչեց դատի,
Բայց դատարան չեկավ կատուն:

***

Կատվի ձագը մկան ձագին
Դուրս է կանչում մկան ծակից.
— Դո՜ւրս եկ՝ խաղանք, մկա՜ն ձագուկ,
Չձանձրացա՞ր մթին ծակում:

***

Ծունկ չի ծալում սունկը այս,
Ունկ չի դնում սունկը այս,
Որովհետև անունկ է,
Եվ անծունկ սունկը այս:

***

Կամը կամին ասաց.
-Կամ,
Ես քեզ հյուր եկած չկամ:
Կամ դու արի իմ տուն, կամ,
Կամ էլ ինձ ընդունիր, կամ:
Կամը ասաց.
-Ոչ մի կամ:
Հենց այսօր իմ հյուրն ես, կամ:

***

Կոշում ապրող մի զգույշ կոշիկ
Գովում էին Կոշի փոշին.
— Աշխարհ անցիր՝ ոչ մի փոշի
Փոշու համը չի տա Կոշի:

***

— Ծովիկ մորքուր,
Ծովիկ մորքուր,
Ի՞նչ կա, գիտե՞ս, ծովի խորքում:
— Ծովի խորքո՞ւմ:
Խորքում ծովի
Չկա ոչ մի մորքուր Ծովիկ:

 

***

Ծոռան ծոռը Սասնա ծռի
Ամենուր էլ ունի կռիվ.
Մեկ է՝ կյանքի թոհուբոհում
Ճամփան ուր կտանի ծռին:

***

Լոկ մկրատն է մկրատում,

Լոկ մտրակն է մտրակում:

Մկրատով չեն մտրակում,

Մտրակով չեն մկրատում:

***

Լորը դիմեց սալորին.
— Բաց թող, — ասաց, — իմ լորին:
Սալորն էլ թե՝ ա՜յ լորիկ,
Թե բաց թողնեմ քո լորին,
Ի՞նչ կմնա ՍԱԼՈՐԻՑ…

***

Լողանում են Սևանում,
Զովանում են Սևանում,
Պառկում տաքուկ ավազին
Սևանում են Սևանում:

 

 

 

***

Լավաշն ասաց լավաշին.
— Հրավիրված եմ խաշի:
Կուզե՞ս, դու էլ եկ գնանք,
Կարծում եմ շատ չի քաշի:

 

***

Լողանի տակ կարթեր են,
Կարթերի շուրջ ձկներ են,
Շրջապատել խայծերին
Ու խոսում են ձկներեն.

— Եթե սրանք կարթեր են,
Կարթերին էլ խայծեր են,
Ուրեմն՝ զուր չեն սրանք
Անվճար մեզ այցելել…

***

Թե խաղեր են խաղարանում,
Տաղարանում տաղեր են,
Պահարանում էլ երևի
Պահիկներ ու պահեր են…

***

Թե հայրիկը պ ա պ ա ն ա,
Թե մայրիկը մ ա մ ա ն ա,
Քո շնորհը կլինի,
Այ ճտպտան սատանա:

***

 

Թռչունը ծնվել՝ թև չուներ:
Թեկուզ թև չուներ՝ թռչուն էր:
Մտքում նա, անշուշտ, թռչում էր,
Ուրախ, որ շուտով երկնքում
Կավելանա մի թռչուն էլ:

***

Գահակալին ու գահին
Մոտիկ կանգնած ագահին
Ոչ գրպանը կփրկի,
Ոչ էլ ստվերը գահի…

***

Գետագետ մի գորտ,
Գորտագետ մի գետ,
Չի եղել մի դեպք՝
Գժտվեն իրար հետ:

 

 

***

Գայլի՛ ժանիք, շա՛ն ժանիք,
Վագրի՛ ժանիք, ա՛յ ժանիք…
Էլ ո՞վ ունի աշխարհում
Նման դաժան արժանիք:

***

Ձուկը, մուկը մեկ տապակ,
Մուկը, ձուկը` մեկ տապակ,
Ձուկը ուտեմ, մուկը թալեմ,
Մուկը թալեմ, ձուկը ուտեմ:

***

Քոթոթը նոթոտ է,
նոթոտ է քոթոթը:
Թեկուզև նոթոտ է՝
Լավիկն է քոթոթը:

***

Օձը դպրոց չի գնում,
Դպրոցում ինչ գործ ունի:
Ինչ որ պետք է այս կյանքում՝
Ատամի տակ օձն ունի:

***

Մեր տան առաջ,
Կանաչ կակաչ,
Կանաչ կակաչ,
Մեր տան առաջ:

***

Ցոլակը ցատկեց
Ցից ցանկապատից,
Ցանկապատը ցնցվեց
Ցոլակի ցատկից:

***

Քեռուս քեռու
Քեռու քեռին
Մանգաղն իր կեռ կախեց կեռից:
Ասաց. «Հերի՜ք,
Քեռու քեռի,
Ծռվեց մեջքդ սրա ձեռից…»:

***

Քանի՜ անգամ եկավ քամին,
Ուզեց առնել, տանել կամին:
Փչե՜ց քամին,
Հրե՜ց քամին,
Բոփե՜ց, շոյե՜ց,
Ոռնա՜ց քամին,
Բայց տեղից չշարժեց կամին:

***

Քաջքերի մեջ մի քաջք կար, որ
Քաջերի քաջն էր քաջքերի:
Չկար մի քաջք, որ չսարսեր
Քաջարի քաջքի աչքերից:

***

Ուղտին մի թուղթ բերին տուղտից.
«Տուղտից հազա՛ր ողջույն ուղտին:
Գո՛հ եմ, որ ուղտն անապատի
Գերադասեց փուշը տուղտից…»

***

Ուղին գնա՛ց, գնա՛ց, գնա՛ց,
Ինքնավստահ գնաց ուղիղ:
Ուղին մտավ մի փակուղի
Ու փակուղուց չելավ ուղին…

***

Փողի գողն ու գողի դողը
Չգիտեն ով է հաղթողը:
Մեկն ասում է՝ փողի գողը,
Մյուսն էլ թե՝ գողի դողը…

***

Ուռի ծառից առույգ մի ուլ
Պոկեց ուռի դալար մի ճյուղ:
Ծիտը ճտտաց. «Ա՜յ, գիժուլիկ,
Մի կոտրատիր ճյուղերն ուռի…»:

***

Ուշեղը ուժեղ է,
Ուժեղը՝ ուշեղ,
Եվ անշեղ ուշեղը
Երբեք չի տուժել:

***

Տոհմածառն էլ ծառ,
Տոնածառն էլ է  ծառ.
Մեկի կյանքը՝ կարճլիկ,
Մյուսինը՝ անծա՜յր…

 

***

Սուտը խորթ է ծառին, ծտին,
Թե ծառ, թե ծիտ դեմ են ստին:
Չգիտեն էլ ծառ ու ծտեր
Հանուն ինչի՞ պիտի ստել:

 

***

 

Սեղանն ասաց՝ մեղմա՜, մեղմա՜,
Այո ո՞նց եղավ,
Այո ո՞նց եղավ.
Սեղանին յոթ պատառաքաղ,
Սակայն ոչ մի բահ ու եղան…

***

Ոչխարները գերերին
Չէին թողնում գելերին:
Գելերն իրենք էին միշտ
Գերում ծույլիկ գերերին…

 

***

Ովքեր չեկան ՝ չկան:
Ովքեր չկան՝ չեկան:

***

Պատ պատողը պայտ չի պայտում,
Պայտ պայտողը պատ չի պատում:
Թե պայտողն էլ պատեր պատեր՝
Ձիերին ո՞վ պիտի պայտեր:

***

Շահը շահին ասաց՝ Շահ,
Կլինի՞ Շահը անշահ:
— Շահը՝ անշա՞հ -, Շահն ասաց, —
Թե անշահ է, էլ ի՞նչ Շահ:

***

Շան հոտ ուներ շան բույնը:
Ասին՝ կօգնի շամպունը:
Շամպուն բերին,
Շան բնում
Հո չբուրեց շամպունը:

 

 

***

 

Շնիկը կծան է,
Կածանը՝ փոշոտ:
Շնիկը փոշի է
Բարձրացնում պոչով:
Խառնվել են իրար
Կծան ու կածան…
Կծանը կածան է,
Կածանը՝ կծան:

 

***

— Մռռանը ի՞նչ գործ ունի
Մռայլ ու մութ մառանում:
— Գնա հարցրու մռռանին,
Մռռանն այդ չի մոռանում:

***

Մի հարց ունեն այս աշխարհին
Սերունդները Մայր ոչխարի.
«Վերջ ի վերջո, գայլը ագահ
Երբևէ կապաշխարհի՞ …

***

Մուկը տիկնիկ-մկնիկ ուներ,
Տիկնիկ-մկնիկը՝ տեր:
Տերը մուկն էր տիկնիկատեր,
Տիկնիկը գիտեր:

***